الأحد، ١ يوليو ٢٠٠٧

رحلة الزهرات


إمبارح رحت الازهر بارك

مع زهراتي الحلويين

كانت رحله في منتهى الروعة

استمتعت انا بيها شخصيا

واستمتعت كمان بصحبة جيل رائع

احيا الامل في قلبي

ووراني مستقبل جمييييييييييل انتظره بفارغ الصبر

..........................

سأنقل لكم بعض من الاحداث والمواقف واللقطات عشان تعيشوا معايا

................

بدأت اليوم بالاستيقاظ 8

لم اكن حضرت اي شيء من السندوتشات او العصائر لاتناوله خلال الرحله لاني كنت عائده للمنزل الساعه 12 مساءا من رحلة في اليوم السابق

وكنت انا واختي المشرفتين على الرحلة

فقولتلها نستفرد بالعيال ونقولهم التذكره ...جنيه وساندوتشين

وهناك..امام البحيرة اقترحت على بناتي ان احنا ناكل مع بعض كل واحدة تأكل اخواتها في الله

بينما كانت اختي تنظر الي بخباثه معتقده اني اطبق مخططي الصهيوني

......................

اخذنا جوله في الحديقة

وكان البنات الطعمين ما بيسبوش اي منحدر غير وياخدوه شقلبه

ولا اي مكان فيه ميه غير ويقضوها تنطيط

وفي احد المرات

سقطت احداهن في المياه

كنت على الجانب التاني

وهممت ان اقفز خلفها

ولكن انتشلتها احداهن بسرعه

والاخرى نزلت على ركبتيها لتحضر لها الشنطه

احساس عالي بالترابط

والاخوه

...........

طلعنا تبه الازهر

اعلى مكان بالحديقه

ولااخفي عليكم حقيقة ان معظمهم صعدوه تسلقا

استمتعنا كثيرا بمشاهدة القاهره ورؤية ماذنها

وسماع اذان الظهر وهو يدوي في القاهره

....................

كان معنا في نفس المكان بعض الشباب

لاحظت على الفتيات محاوله جاده للحفاظ على هدوئهن الغير معتاد

وكذلك تجنب الاحتكاك بهم

مما اثلج صدري

...................

نزلنا من التبه واتجهنا ناحية الشلالات

وهناك اتى احد الموظفين ليخبرني بان المكان ممنوع

لانهم عيال وهيلعبو في الميه

طبعا لم يرحم من تعليقات لاذعه تعبرعن غضبهم

اظرفهم تعليق احداهن

قال يعني ما بتحطش رجليك وتبلبط اخر النهار

....................

صلينا الظهر على احد المسطحات الخضراء

ثم اتجهنا لملاعب الاطفال

هناك...

استمتعنا جدا باللعب

واتت الينا احد الموظفات بتقييم عن الحديقه

فلاقيت حس عالي يالامنيات

يا ابله نكتب التليفون؟؟؟؟

.............

نزلنا باتجاه السور الايوبي

وهناك استعدنا قصة صلاح الدين

وكيف انه قائد صنع التاريخ

وتمنينت معهم ان يكونوا قاده ويتركون اثارا خالده كصلاح الدين

وتذكرنا الام فلسطين

..............

وعدنا للبحيره

منشدين

ياأقصانا الحبيب

ابشر بالخلاص

راجع صلاح الدين

من ابناء حماس

.............

وكمان غنوا

شاطر شاطر شاطر وهوديك القناطر

............

جرينا ولعبنا

......

اتغدينا عند البحيره

وصلينا العصر

ورشوني بالميه من النوافير

..........

وفي طريق العوده

انشدنا

وقلنا الاذكار

وقيمنا الرحله

وودعنا بعضينا بحب

هناك ٢٠ تعليقًا:

غير معرف يقول...

المرة الجاية ابقي اكتبي تفاصيل أكتر لحسن بتوع الأمن لسه معرفوش أسامي العيال الثلاثية.. وبعدين ابقي ابعتي لنك للبوست ده لبتوع الأمن عشان ميقعدوش يدوخو علي معلومات عظيمة كده..

شاويش يقول...

يوم جميل

بس اية الانفتاح ده الي الاخوان عيشيت فية

بكرة هيقولوا علي معاد الرحلة قبلها

علي العموم رحلة موفقة

شاويش يقول...
أزال المؤلف هذا التعليق.
Alaa يقول...

ربنا يبارك فيكي و فيهم
و يتقبل منك
امين

جمعاوى يقول...

رحلة موفقه

و تفاصيل جميلة


بس البنانيت الجميلة دى

سنهم أد ايه ؟


ومحدش يفهم غلط

Saad El-Shater يقول...

www.ibn-elshater.blogspot.com

غير معرف يقول...

ايه ده ايه ده ايه ده؟؟؟؟

مال الكابتن هريدى ده داخل فيها كده شمال........

بشويش شويه فى التعامل و ماتنساش انك ولد و هى بنت.....


و انا اكتر شخص ممكن تشوفوه فى حياتكوا بيحرص من الامن بس انا مش شايفه ان ده فيه حاجه......


لان الامن عارفين ان فى زهرات و انهم بيروحوا رحلات......


و اكيد فى الازهر صوروهم بعنيهم لما شبعوا و بلغوا المركز بتاعهم........

يعنى مش حاجه جديده.....


ماهو احنا مش نمشى فى الشارع نقول احنا اخوان احنا اخوان زى الهبل اللى ماشيين فى الزفه,و نيجى على الحاجات التافهه دى و نعمل فيها رجاله و جدعان.....


معلش لو كانت طريقتى فى الرد رخمه و بايخه و خاليه من الزوق بس انا موضوع الامنيات ده بينرفزنى لان الناس فهماه غلط..

او يمكن انا شايفه ان الناس فهماه غلط و اطلع فى الاخر ان اللى فهماه غلط...

غير معرف يقول...

طب كويس انها كانت رحلة جميييلة

ربنا يجعلها فى ميزان حسناتكم

وعقبالنا

حلوة الازهر بارك (او حديقة الازهر عشان ازمة الهوية )

ودايما يبقى الجو حر وشمس
ونفضل حرانين
واول ما الجو يبقى رائع
يبقى جه معاد مرواحنا
:(
سلامى لكى ولزهراتك
:)

غير معرف يقول...

شكل رحلة زهرات حضرتك

كانت جميلة

يارب دائما

حضرتك تكوني سعيدة بهذه

الرحلات يس عايزة اعرف حاجة

هو حضرتك كنتي حاسة انك مبينالهم

انك مبسوطة؟؟؟؟؟؟

Rehab Saber يقول...

تبارك الله
شعور صادق

أحمد سعيد بسيوني يقول...

بسم الله
كويس ان الاطفال يغيروا جو
عقبالنا احنا الكبار ما نخلص امتحانات ونطلع للدنيا
دعاؤكم لنا
تحياتي
البحر

اسماء العريــان يقول...

ربنا يباركلك فيهم يارب

صحيح.. انتى عملتى ايه فى النتيجه ؟؟

محمد البرلسى يقول...

ربنا يعينك
تحيا تى

hafed mohamad يقول...

انا الفكرة دي كانت في بالي من فترة

وبما ان حضرنك قلتي ان المكان حلو

انا ان شاء الله هنفذ الفكرة قريبا

أحمد السباعـي يقول...

الحمدلله زوجتي مكسرات نجحت وجانب تقدير جيد

الحمد لله

ألف ألف مبروووووووووووك ليها
وبالتوفيق دائما

Islamist Bloke يقول...

ما شاء الله.........تبارك الله

الله اكبر......اعظم تحضير لامهات المستقبل

جزاكن الله خيرا




"قال يعني ما بتحطش رجليك وتبلبط اخر النهار"

صاحبة التعليق ده.......واضح انها زي السكر..........ربنا يبارك ويجعلها من الناجحات

الواحد استبشر خير بمستقبل البلد


والسلام

دعوة الفردوس يقول...

ربنا يكرمك ياااااااارب

وألف مبروك على النجاح أولا

على فكرة انا نفسي اشتغل زهرات جداااااااااا

ادعيلي ربنا يوفقني للامر ده
لان لسه وشغلي التاني واخدني شويه

ويوم مااشتغل زهرات -ان شاء الله- هبقى اجي اخد عندك كورس كده في المواضيع دي

عمر عاشق القرآن يقول...

احلى رحلات اللى تطلعيها مع الاولاد وانتى المشرفة

طبعا انا مش بطلع مع زهرات انا بطلع مع أولاد .. بيسموهم اشبال بس انا بسميهم أشباح

بتعب اوى بس ألذ رحلة و أجملها

ربنا يتقبل منا ومنكم

أم عماره يقول...

جميله أوي الرحله دي
دايماً بتفكرني الأطفال بالزرع
ربنا يجعلهم نبته صالحه يقيم بها أعوجاج هذا الدين
فكرتيني بالذي مضي يامكسرات
استوقفني أوي استغلالك لكل المواقف الممكنه لغرس القيم والمعاني التربويه
طبعاً يافندم التربيه دي تخصص
ربنا يجعله في ميزان حسناتك ان شاء الله
ويؤيدك بعونه وتوفيقه وقبوله

شهاب الأزهر يقول...

صحيح فعلا .. قال يعني مش بيبلبط آخر النهار، يظهر ان الردود المحرجة سمة مشتركة عند الأطفال.. (زهرات، وأشبال)

فاكر إن أشبالي كنا في رحلة، وكان المكان مليان رحلات أشبال نصارى، المهم واحد منهم وهوا بيلعب جت واحدة من مشرفاتهم وسألته: انت تبع أي كنيسة؟؟

أجاب بغضب: عمرو بن العاص يا حاجة