الخميس، ١٤ فبراير ٢٠٠٨

مربيتي...الله يرحمها


أهلا أهلا ..فينك يابنتي ..تعالي فحضني.. أتأخرتي..فين إخواتك؟؟
يلا هنبدأ..هم هيجوا..تعالي ندعيلهم..أصل الدنيا بتلهي يابنتي
بس بقولك..إنت جديده..لسه لا بيت ولا حتى ولاد..خدي بالك ..قربت خلاص
..............
فكريني يابنتي..وصلنا لفين؟؟ ناوليني المصحف..أيوه الربع التاني من الجزء الخامس
كم أيه؟ خلاص أنا 5 وأنت 5..يلا يابنتي...ياترى مين جه؟؟ أهلا أهلا..فينك؟ اتأخرتي
فين الواد؟ تعالي فحضني....خلاص هي4 وأنا وانت 3 بسم الله ونرتل والمح خالتو بتمسح دمعه بسرعه
ونخلص....شيلي المصحف..حطي الورقه عالربع الثالث ..يلا هندعي..كله في سره ولا جماعي؟؟
زي ماقولتوا ندعي جماعي..بس ماتنسوش اخواتكم..ادعولهم يجوا والدنيا تسيبهم..وفلانه ادعوا لجوزها أصله إتاخد..وفلانه ادعوا لابوها أصله هايعمل عمليه..وادعوا كمان لاخواتكم الله يحررهم ويصبر أهاليهم..وادعولنا يزيد ايماننا..أصل ده كله ذنوب..وماتنسوش حبايبنا فغزه..ياترى مين جه؟؟ أهلا أهلا..فينك ياحبيبتي تعالي فحضني..يلا هندعي......
......................
أخباركم إيه؟؟ ياحبايبي..ربنا يعينكم..الشغل معاناه..بس طالما عندك فكره عيشي عشانها
بت أنت خدي بالك..لتروحي فطيس..خصمك فايق..الله يهديكي ويحفطمكم
.....
يلا يافاطمه ..قولي جديدك..قولي أخبار اخواتنا ..قولي حبيبتي..
اااه ياولاد ده بذنوبنا ..والحل حبايبي اننا نستغفر ونركز عالايمان
قولي ياساره ازاي نرجع؟؟ صح حبيبتي نصلي الفجر..وكمان إيه؟
أيوه برافو نثبت بعض..أيوه صحيح ..علا تعبانه..ادعولها..وتعالوا نزورها
.................
قولي يابنتي عن الاخلاص..قولي حبيبتي..سبحان الله..
يابناتي أنا قبليكم مليانه ذنوب..لازم نرجع..تعالوا نتقرب لربنا..كل واحده تجيب عمل..
بس يكون خالص لله..نتقرب لربنا بيه انه يكشف الغمه عننا..دوروا ياحبايبي..يارب تلاقي..
أصل أنا مالقيتش..
......................................
ها يابناتي..جبنا الورد؟؟ أيوه الورد..أمال بتحاسبوا نفسيكوا ازاي؟؟
ليه ياحبايبي؟؟انا هخصمكم..لالا زعلانه..أخر مره؟؟؟ خلاص مش هازعل بس يجيني المره الجايه
................
المره الجايه..لا مش عندي..هاقدر أجيلكم ..اللي تحبوه
............
بت ياساره خدي بالك من جوزك
ياأيات..حماتك حطيها فعنيكي
ياهبه..بنتك بتسنن..غذيها كويس
وانت يافاطمه..روحي الكورس..عايزين نخلص ونشوف حاجه تانيه
شيماء..فوتي على علا وزوريها..أصلها جنبك..
وانت ياهاجر .. مالك ساكته؟؟مش عجباني..حد مدايقك..متاخديش الدنيا في صدرك
.........
المره الجايه ماتنسوش..هنراجع السوره..واللي هيتأخر خسران..هنسيبه ونبدأ..
ومتنسوش صلاة الفجر..هنرن لبعض..
........................
تعالي فحضني أنت وهي..خدي بالك من نفسك..سلمي على مامتك..وادعولي معاكم
الاربع مس فاضيه الصبح..عندي الشغل..والمغرب دكتور القلب..الجمعه لاخالص عشان أجوازكم
اتفقوا وأنا هاصرف..اللي يريحكم
.............................
........................
و.......
مش قادره أكتبها
ماتت خالتو
والله ماتت
والله العظيم ماتت
ماتت امبارح
وميعادنا كان امبارح
واتأجل
أصلها ماتت
مش قادره أتخيل
ظهري اتكسر
ماتت خالتو
هكتبها كتيير
يمكن أصدق
عايزه أكتب وأكلم عن خالتو كتيير
من زمان
من غير ماتموت وتسيبنا
كان نفسي اكتب عن اخلاصها وجهادها وحضن الام
كان نفسي احكي عن كفاحها مع المرض وصبرها
عن زوجها والحب اللي ما بينهم
كان نفسي أحكي عن مشاغبتنا وطولة بالها علينا
كان نفسي احكي واروح اقولها شوفت ياخالتو كتبت ايه
وأفتح مدونتي واوريها
فتقولي يابت ..خدي بالك..أمنياتك مضروبه..هتودينا فداهيه
انا مااموتش فطيس ..أما أعمل حاجه
.................
ميعاد الاسره كان امبارح
واتأجل للنهارده
وانهارده اتلغى
أصل خالتو ماتت
يمكن ماتت عشان تحيي قلوبنا
عشان نرجع
عشان كلماتها تعيش
بس والله ياخالتو كنا ناويين نتغير
جبنا كراريس للورد
والله ياخالتو من ساعة ما قولتلنا كفايه واحنا بنراجع نفسنا
كنا هنتغير من غير ماتموتي ياخالتو
كنت خاصمينا ياخالتو
أو حتى سيبينا
من غير ماتموت
كانت تعاقبنا
تعمل فينا أي حاجه
اااااااااااااااااااااااااااه
الله يرحمها

هناك ٢٢ تعليقًا:

فارس الأزهر .. معاذ فتحى يقول...

السلام عليكم
هناك من يموت ليموت
وهناك من يموت ليبعث الحياة فى الأجيال
* فالبنا مات لتحيا دعوة الإخوان بعده عالية ً شامخه
* والشيخ ياسين مات لتنطلق صواريخ القسام
* ومربيتك ماتت .. ونسأل الله أن تكون شعلة ً لحياة الأجيال
البقاء لله
وإنما الصبر عند الصدمة ِ الأولى
وبوركت هذه المدونة الرائعه
وتقبلوا مرورى
وننتظر بسمتكم إن شاء الله على مدونتى المبتدئة جديدا فى عالم التدوين
وعليكى بالصبر
ياقلب بالصبر تجمل
لليل ساعات ويرحل
والسلام عليكم

آية يقول...

يا حبيبتي ... ربنا يصبرك و يصبر اخواتك ويصبر زوجها و أولادها قبلكم و يرحمها رحمة واسة و يتقبلها عنده و يجعلها من أهل الجنة السابقين إليها..
انا حاسة انتي عاملة ازاي دلوقتي بس فكري ان يمكن ربنا بعتلنا كلنا بوفاتها رسالة ....
عارفة يمكن عايز يقولنا و احنا في وقت كلنا بنفكر فيه ازاي هنبتدي حياتنا و نبنيها انها ممكن تخلص و احنا مش واخدين بالنا و لا عاملين حسابنا
و يمكن عايز يفكرنا ان في ناس على عمرهم الصغير ممكن يسيبوا حاجات حلوة و كبيرة في نفوس ناس تانية عشان منأجلش حاجة ممكن نعملها دلوقتي لبعدين ...
فكري يا حبيبتي قد ايه رسايل ممكن تكون مبعوتة لنا في موقف زي ده و فكري انها قد ايه كانت حد قريب من ربنا و القريب ربنا بيقربه و ادعيلها بالجنة و ادعي تكونوا زي ما كنت نفسها تشوفكم و ادعي تتعلموا منها في حياتها و مماتها ...

Bent Elqran يقول...

ربنا يصبرك يا حبيبة قلبى
ربنا يغفر لها ويرحمها ويسكنا فسيح جناته

رغم إنى مش شفتها أكتر من مرتين أو تلاته لكن كنت بحبها جداااااا

كان ليها إبتسامه حلوه عمرها ما فارقتها

ربنا يجعل قبرها روضة من رياض الجنه

الموت قريب أوى مننا

لازم نعمل لليوم ده ....

jejemam55@gmail.co يقول...

البقاء لله
ادخلها الله الفردوس الاعلى
والحقنا بها على خير

صبرك الله اختاه وصبر اخواتك وزوجها واولادها

وان شاء الله تكونو لها صدقه جاريه
تدعون لها دوما فانتم ابنائها

أحمد السباعـي يقول...

البقاء لله
اصبري واحتسبي

وزي ماقلتلك
لو عايزة خلتو تفرح بيكي
شدي حيلك كمان وكمان في دعوة ربنا

عشان انتي وصحباتك صدقة جارية خلتو عملتها في حياتها

ويارب نموت على ماتت عليه خلتو
نحسبها كذلك ولانزكيها على الله

الأزوري يقول...

نسأل الله العظيم أن يرحمها ويجعل مثواها الفردوس الأعلى ويتقبل جهادها وأن يسكنها الجنة مع النبيين والصديقين والشهداء وأن يلحقنا بها على خير حال

وائل_صح ولا غلط_ يقول...

البقاء لله

لله ما اخذ وله ما اعطي وكل شئ عنده بمقدار

انا في بداية البوست افتكرت حضرتك بتتكلمي عن مسئولتك وبتوصفيها وهي عايشه

فقلت ياسلااااااام، الواحد نفسه في مسئول يتعامل معاه بالطريقه دي

و لما كملت البوست فالواحد حس قد ايه هي كانت قدوه ومثل اعلي بالنسبه ليكوا

ربنا يصبركوا

وان شاء الله هي اكيد الوقتي في الجنه

Fahd يقول...

فليرحمها الله

قد ابكتني الكلمات

دائما هناك من يموت في حياتنا

ليخبرنا ان الفرصه امامنا لم تعد كبيره

ليخبرنا ان علينا ان نستعد

فقد اوشك الرحيل

فليرحم الله الجميع

محمد يقول...

الحمد لله .. الحمد لله

هذه هي الكلمة الوحيدة الذي أستطيع أن أقولها الآن ..

رحمة الله عليها .. اللهم أسكنها الفردوس الأعلى , اللهم اجعل مرضها في ميزان حسناتها , اللهم اجمعها بأهلها وأحبابها وبناتها عند الحوض .. اللهم صبر أهلها

اللهم أجر أمتك في مصيبتها واخلفها خيرا منها

لا حول ولا قوة إلا بالله

البقاء لله أختي

مزايا العقارية القابضة يقول...

:'(

لله ما أخذ و لله ما أعطى و كل شيء عنده بقدر

فلنصبر و لنحتسب

ربنا يرزقنا حسن الخاتمة

و الله أبكيتيني :'(

سما الإسلام يقول...

حبيبتي
صبرا
فكلنا سنلحق بها
و لكن هل سنلحق بها و عندنا رصيد كافي نحسبه كان عندها
اللهم آمين

البقاء لله
أسكنها الله فردوسه الأعلي
و رزقها صحبة النبي صلي الله عليه وسلم

صبرا
حبيبتي

غير معرف يقول...

إن لله ما أخذ وله ما أعطى وكل شيئ عنده بأجل مسمى فلتصبري ولتحتسبي

اللهم أغفر لها اللهم أرحمها

غير معرف يقول...

اللهم أرحم أموات المسلمين جميعا وتقب منهم صالح الاعمال زأحشرهم مع النبيين والصديقين والشهداء

غير معرف يقول...

Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the TV de LCD, I hope you enjoy. The address is http://tv-lcd.blogspot.com. A hug.

السينيور يقول...

ربنا يرحمها

ويسكنها فسيح جناته

اصبري واحتسبي اختى

غير معرف يقول...

كوني هنا دائما

لا تبتعدي كثيرا

يجب ان نعافر رغم قسوة الحياه


تحياتي
و
محبتي

ســـارة يقول...

ماتت خالتو !

الله يرحمها ويوسع لها في قبرها

إنا لله وإنا إليه راجعون

أثرت في التوينة وما حكيته عنها رحمها الله

خصوصاً تأكيدها على أن كل ما يصيب الإنسان من سوء بسبب ذنوبه

اللهم لا تجعل الدنيا أكبر همنا ولا مبلغ علمنا ولا إلى النار مصيرنا

الكاتب احمد كاجوال يقول...

الحلقة المحظورة ...
الأن في صحبة ........
دعوة عامة
تدعوكي مدونة الصحبة للرد علي أبشع المقالات عن الأخوان المسلميين .... بالله عليكم أرجوا الرد لنعرف من علي صواب

* الأخوان تخلوا عن الشعب
* من الصحبة الي الأخوان

و أكثر ... بل و أبشع ... فقط في الحلقة المحظورة ... علي مدونة صحبة بالله عليكم أدخلوا هنا
وشوفوا انا عندي حق ولا لأ بس ردوا
أوكية
http://so7bah.blogspot.com/

الكاتب احمد كاجوال يقول...

أنتظر الردود و شكرا

أحلام ممنوعة يقول...

البقاء لله نسأل الله أن سصبرك وإخوانك ويجعلكن من المحتسبات ونسأل الله الثبات لزوجها وأولادها .. اللهم لاتفتنا بعدها ولا تحرمنا أجرها وأغفر اللهم لنا ولها,, اللهم أفسح لها فى قبرها مد بصرها وأجعله روضة من رياض الجنة ...
حقيقة جزاكم الله خيرا أثرت فى كثيرا تلك التدوينة

Unknown يقول...

شركة المثالية لتنظيف المنازل بالدمام
شركة المثالية للتنظيف بالدمام
شركة تنظيف بالقطيف
شركة تنظيف منازل بالقطيف

ابوعدي للتسوق يقول...

شركة تنظيف بالقطيف
شركة تنظيف بالاحساء