بسبوسة

المواضيع الكتيرة دي اللي كلها فيهااكل مالهاش علاقه باني خلاص شهرين واتجوز , ولا ان كل اللي حواليا بيحاولو يدوني عصارة خبرتهم, ولااني مهتمه بالاكل
دي افكار وهميه في دماغكم وده سوء ظن
المهم
احكيلكم حكاية البسبوسه
البسبوسه دي حاجه محترمه جدا
كان سفيان الثوري -أحد التابعين-لما يكون عايز يصلي قيام يجيب البسبوسه قدامه ويمني نفسه بأكلها عشان هو كان بيحبها جدا وبعدين يقول لنفسه لو قمت الليل ممكن تاكلها
وطبعا كان بيقوم الليل
................
الشيخ صفوت حجازي لو تعرفوه هو كمان بيحب البسبوسه وقال كده في ندوه كان عملها عن الحب في الاسلام في ساقية عبد المنعم الصاوي
.....................
بقولكم الكلام ده لي
عشان حاجتين
اول حاجه ده دليل على ان العظماء بيحبوا البسبوسة ولاحرج ابدا مني أقولكم اني بحب البسبوسه
الحاجه التانيه
احمد (جوزي) جابلي في عيد ميلادي طبق بسبوسه من لابوار
كان ساعتها عايز يجيب تورته بما انه عيد ميلاد لكن لما افتكر حبي للبسبوسه غير رايه وجبهالي
ساعتها اتعلمت درس جامد اوي وهو
ان احنا كتيير بنقدم للناس اللي احنا عايزينه وبنحبه مش اللي هم عايزينه
وبكده بنكون زي اللي بيحب المربه فبيحطها في السناره عشان السمك يطلع
اوقات مثلا الراجل بيكلم مراته بايجاز شديد رغم انها ممكن تكون بتحب التفاصيل كاغلب النساء والعكس هي تمسك ودنه من ساعة ما يرجع رغم انه عايز الايجاز كاغلب الرجال
كمان اوقات بيكون حد مش متدين خالص وهمه ينجح وبس واحنا عايزينه يصلي مثلا او تلبس الحجاب فنعد نقوله حرام عليك ما تصليش هتدخل النار وهو مش ده اللي شغله
لكن مثلا لو قولناله صلي عشان اما تكون في مشكلة تدعي ربنا فيحلهالك او عشان ربنا يوفقك
اونقولها البسي الحجاب عشان تحافظي على نفسك والشباب يحترموكي وماشابه
اوقات تانيه بنكون احنا مهتمين بالسياسه وغيرنا مهتم بحاجات تانيه زي فرص الشغل زي انه يحقق ذاته زي انها عايزه تجوز او حتى تجيب فلوس عشان تكمل تعليمها
اروح اقولها اعملي بطاقة انتخابيه
لو انت مكانها هتبصلي ازاي؟
يبقى عشان نعرف نتعامل مع الناس كويس لازم نحط نفسنا مكانهم نحس بيهم تكون احتياجات الاخر واهدافه من اكبر اهتماماتنا والا نسيبه فحاله ومنشغلوش باهدافنا احنا او باللي احنا بنحبه

جوزة الهند

أحيانا بنلاقي حاجات حوالينا تعلمنا معاني نسينها
زي كده ما بنقول : صبور زي الجمل ..
أو مرن زي المايه..
او وضيع ومتكبر زي الدخان..
كمان من هنا ورايح هنقول ده .....و...........و........ زي جوزة الهند

تعالو اقولكم اشمعنى جوزة الهند؟
اولا:جوزة الهند اسمها جوزة الهند
رغم انها راحت مصر والسودان وسوريا واستراليا ولفت العالم لكن ما زالت هي جوزة الهند
ورغم انه لما واحد يجي ينفي عن نفسه صفة العبط يقول هو انت فاكرني جاي من الهند
وكمان لما يكونوا عايزين يقولوا على واحد عبيط يقولو ده جاي من الهند على فيل
كل ده ماخلاش جوزة الهند تغير اسمها او تنكر اصلها هي ما زالت جوزة الهند

ثانيا:احنا بناكل رز اللبن بجوزة الهند والبسبوسة بتتعمل بجوزة الهند ولو تورتة شيكولاته بنزوقها بجوزة الهند وكمان لو مهلبية جزر بنحط عليها جوزة الهند
ولو جربت تاكل شيكولاته باونتي او جيرسي هتلاقيا محشية جوزة الهند ولو جربت تجيب رافيللو هتلاقيا كرات جوزة الهند
يعني مرونه لا نظير لها
مستعده تدخل الفرن او تتحط في الشيكولاته او تكون حاجه هامشيه يعني زواق على الوش
مكان ماتحطها تلاقيها
تجيب في حتت كتيير
مش عايشه في دور المهم
عندها مرونه رهيبه

ثالثا:رغم انها لفت كل مكان ودخلت اكلات كتيييره اوي لكن لونها لسه ابيض
ماعكرهاش سواد الشيكولاته ولا برتقنة الجزر ولا صفار البسبوسه
يعني بتروح كل حته منفتحة على مجتمعات كتيير وبتدخل مع نكهات كتيير وتكون في اوضاع مختلفه لكن زي ماهي ماغيرتش توبها وقالت عشان ماكونش غريبة وهو ده اللي اداها تميزه في اي مكان تروحه
.........................
بصراحه اتمنيت لو كانت جوزة الهند واحده عشان اصاحبها واتعلم منها
.....
لو حد في يوم من الايام عايزيجيبلي حاجه حلوه يجيبهالي بجوزة الهند

مربيتي...الله يرحمها

أهلا أهلا ..فينك يابنتي ..تعالي فحضني.. أتأخرتي..فين إخواتك؟؟
يلا هنبدأ..هم هيجوا..تعالي ندعيلهم..أصل الدنيا بتلهي يابنتي
بس بقولك..إنت جديده..لسه لا بيت ولا حتى ولاد..خدي بالك ..قربت خلاص
..............
فكريني يابنتي..وصلنا لفين؟؟ ناوليني المصحف..أيوه الربع التاني من الجزء الخامس
كم أيه؟ خلاص أنا 5 وأنت 5..يلا يابنتي...ياترى مين جه؟؟ أهلا أهلا..فينك؟ اتأخرتي
فين الواد؟ تعالي فحضني....خلاص هي4 وأنا وانت 3 بسم الله ونرتل والمح خالتو بتمسح دمعه بسرعه
ونخلص....شيلي المصحف..حطي الورقه عالربع الثالث ..يلا هندعي..كله في سره ولا جماعي؟؟
زي ماقولتوا ندعي جماعي..بس ماتنسوش اخواتكم..ادعولهم يجوا والدنيا تسيبهم..وفلانه ادعوا لجوزها أصله إتاخد..وفلانه ادعوا لابوها أصله هايعمل عمليه..وادعوا كمان لاخواتكم الله يحررهم ويصبر أهاليهم..وادعولنا يزيد ايماننا..أصل ده كله ذنوب..وماتنسوش حبايبنا فغزه..ياترى مين جه؟؟ أهلا أهلا..فينك ياحبيبتي تعالي فحضني..يلا هندعي......
......................
أخباركم إيه؟؟ ياحبايبي..ربنا يعينكم..الشغل معاناه..بس طالما عندك فكره عيشي عشانها
بت أنت خدي بالك..لتروحي فطيس..خصمك فايق..الله يهديكي ويحفطمكم
.....
يلا يافاطمه ..قولي جديدك..قولي أخبار اخواتنا ..قولي حبيبتي..
اااه ياولاد ده بذنوبنا ..والحل حبايبي اننا نستغفر ونركز عالايمان
قولي ياساره ازاي نرجع؟؟ صح حبيبتي نصلي الفجر..وكمان إيه؟
أيوه برافو نثبت بعض..أيوه صحيح ..علا تعبانه..ادعولها..وتعالوا نزورها
.................
قولي يابنتي عن الاخلاص..قولي حبيبتي..سبحان الله..
يابناتي أنا قبليكم مليانه ذنوب..لازم نرجع..تعالوا نتقرب لربنا..كل واحده تجيب عمل..
بس يكون خالص لله..نتقرب لربنا بيه انه يكشف الغمه عننا..دوروا ياحبايبي..يارب تلاقي..
أصل أنا مالقيتش..
......................................
ها يابناتي..جبنا الورد؟؟ أيوه الورد..أمال بتحاسبوا نفسيكوا ازاي؟؟
ليه ياحبايبي؟؟انا هخصمكم..لالا زعلانه..أخر مره؟؟؟ خلاص مش هازعل بس يجيني المره الجايه
................
المره الجايه..لا مش عندي..هاقدر أجيلكم ..اللي تحبوه
............
بت ياساره خدي بالك من جوزك
ياأيات..حماتك حطيها فعنيكي
ياهبه..بنتك بتسنن..غذيها كويس
وانت يافاطمه..روحي الكورس..عايزين نخلص ونشوف حاجه تانيه
شيماء..فوتي على علا وزوريها..أصلها جنبك..
وانت ياهاجر .. مالك ساكته؟؟مش عجباني..حد مدايقك..متاخديش الدنيا في صدرك
.........
المره الجايه ماتنسوش..هنراجع السوره..واللي هيتأخر خسران..هنسيبه ونبدأ..
ومتنسوش صلاة الفجر..هنرن لبعض..
........................
تعالي فحضني أنت وهي..خدي بالك من نفسك..سلمي على مامتك..وادعولي معاكم
الاربع مس فاضيه الصبح..عندي الشغل..والمغرب دكتور القلب..الجمعه لاخالص عشان أجوازكم
اتفقوا وأنا هاصرف..اللي يريحكم
.............................
........................
و.......
مش قادره أكتبها
ماتت خالتو
والله ماتت
والله العظيم ماتت
ماتت امبارح
وميعادنا كان امبارح
واتأجل
أصلها ماتت
مش قادره أتخيل
ظهري اتكسر
ماتت خالتو
هكتبها كتيير
يمكن أصدق
عايزه أكتب وأكلم عن خالتو كتيير
من زمان
من غير ماتموت وتسيبنا
كان نفسي اكتب عن اخلاصها وجهادها وحضن الام
كان نفسي احكي عن كفاحها مع المرض وصبرها
عن زوجها والحب اللي ما بينهم
كان نفسي أحكي عن مشاغبتنا وطولة بالها علينا
كان نفسي احكي واروح اقولها شوفت ياخالتو كتبت ايه
وأفتح مدونتي واوريها
فتقولي يابت ..خدي بالك..أمنياتك مضروبه..هتودينا فداهيه
انا مااموتش فطيس ..أما أعمل حاجه
.................
ميعاد الاسره كان امبارح
واتأجل للنهارده
وانهارده اتلغى
أصل خالتو ماتت
يمكن ماتت عشان تحيي قلوبنا
عشان نرجع
عشان كلماتها تعيش
بس والله ياخالتو كنا ناويين نتغير
جبنا كراريس للورد
والله ياخالتو من ساعة ما قولتلنا كفايه واحنا بنراجع نفسنا
كنا هنتغير من غير ماتموتي ياخالتو
كنت خاصمينا ياخالتو
أو حتى سيبينا
من غير ماتموت
كانت تعاقبنا
تعمل فينا أي حاجه
اااااااااااااااااااااااااااه
الله يرحمها

مكسراتي........كل سنه وانت طيبه

انهارده يوم ميلا د مكسرات
ايوه بقالها سنه
هي كبرت
وانا كمان كبرت
من سنه وكام شهركنت بحلم
بحلم باني هعمل مدونه
اكتب عليها افكاري
وخواطري
والامي
ياااااااااااااااه
من سنه وكام يوم
كنت بفكر في اسم مدونتي
أعملها ازاي
اسيب اخويا يعملهالي
ويبقى ليه الفضل والمنه
لا
انا هعملها
هحاول وزي ماتيجي
من سنه وكام دقيقه
كانت مكسرات
على وشك الولاده
ووصلت مكسرات
واستقبلتها بأخيرا مكسرات
ونسيت الباسورد
وناس كتيييييييييير قالوا اخيرا
مدونه لبنت اخوانيه
يلا فينك
وانا منظري وحش
واخيرا لقيت الباسورد
وكتبت
.................
مكسرات تجربه علمتني كتير
كتبت انا اسف
ومن بعدها بقيت بفكر في اخطائي قبل ما الوم حد
وكتبت شعري وعبرت
عن غضبي في قلمي الحر  
كتبت عن رحله الزهرات
وبعدها حسيت اوي بالنعمه اللي معايا وكمان المسؤليه
كتبت انا مختلف
ونفست عن ضيقي
كتبت هل صرنا كغثاء السيل
فامدني الرائعون بالامل
..................
ناس كتير اعرفهم او معرفهمش
شجعوني
تابعوني
نصحوني
فكروني
عشان مكسرات
على راسهم
زوجي احمد السباعي
رفيقة الكفاح آيه
الصديقه الرائعه اسراء
اختي خديجه
المدون الفاضل وضاح
والمدون عصفور المدينة
وكثيرون
لم اذكر اسمهم لذاكرتي السيئه
ولكن شانهم عظيم
انا مدينه بالشكر لكل من خط كلمات في مدونتي
لكل من شارك في ادارة الحوار
أواطل على مدونتي
اونصحني
........................
مكسرات
احب اعترفلك اعتراف من حقك
انا بحبك اوي
لدرجة اني بفكر فيكي كل وقت
كل ما اروح الاسره
اخرج مع احمد
اقابل الزهرات
احضر لقاء
اروح مسيره
كل ماابعد عن ربنا
او اقرب
كل ما احضر محاضره
اقرا كتاب
اتفرج على الاخبار
اجي اخد قرار
كل وقت
افكار كتيير
اقول هكتبها على مكسرات
صحيح انا من كل 20 فكره لما بكتب واحده
بس بفتكرك
سامحيني
وبوعدك اني هاكون احسن
كل سنه وانت طيبه يا مكسراتي
كل سنه وانت عامره
وانت مدونتي
...........
اتمنى كل واحد وكل واحده
يدخل ويقول
كل سنه وانت طيبه يا مكسرات
ويقول
ايه تقييمه لمكسراتي
ويقترح عايز ايه او متوقع ايه من مكسرات
في انتظاركم انا ومكسرات

خالط بتميز

مش عيب اننا ننفتح على المجتمع

ولا عيب اننا نخالط جميع شرائحه

ولا كمان عيب اننا نقرب من الواقع اوي ونفهمه

لكن

العيب ان يحصلنا ما يسميه علماء النفس بالتكيف الحسي

ويسميه علماء الدين ألفة المعصيه

حاجات كتييييييييييييييييييييييييييير ماكانش ممكن تكون فينا وبقت فينا

لاننا اوقات واحنا بنخالط بننسى هويتنا

بننسى نيتنا

ويتسرب لينا ظواهر سلبيه جدا

والامثله كثييير

من العروسه اللي واخدها الدنيا وبتعمل زي ما اي حد ممكن يعمل من ضغوط على الاهل والزوج

للبنوته اللي بتلوي رقبة حجابها تحت شعار المسلمه العصريه

للأغنيه الاسلاميه "مش نشيد"

للشات مع الجنس الاخربهدف سامي وبعدين بحجه

للكلمات ال..........اللي اعتدنا سماعها في الافلام وممكن نبدأ نرددها

أصل احنا هنخالط فلازم نفهم ونعرف كل حاجه

!!أصل احنا ملايكه

!!معصومين

ولا هنتاثر ولا حاجه

أنا بذكر نفسي واياكم

..........................

عشان ماكونش بعرض المشكله في أبشع صورها بدون حل زي افلام المخرج القدير...............

انا بقترح على من يخالط ان يتخيل لو الرسول مكانه كان هيخالط ازاي؟؟؟؟؟؟؟؟؟؟؟؟

وفي انتظار تعليقاتكم

!نعمة الثلاموس

أثناء أحدى المحاضرات الشيقه لمادة علم النفس الطبي

"جاء ذكر الثلاموس" أحد أجزاء المخ يقع في منطقة جذع المخ

فكان هناك تساؤل هل هو فص من فصوص المخ أم غده؟؟

نفت الدكتوره ان يكون أحد الخيارين

:وشرحت وظيفته وهي

إستقبال إشارات الاعصاب الحسيه وتوزيعها على مراكز الاحساس في المخ

يعني لو أحساس بالجوع تنقله لمركز الجوع

ولو منبه بصري تنقله لمركز الابصار ويقوم المركز باصدار استجابه ملائمه
...........
سرحت بعيدا عن المحاضره

!!تخيلت لو ثلاموسي عطل وبقيت بستبقبل منبهات الالم وما فيش استجابه

ايدي مثلا بتتحرق بس مخي واقف مش عارفه اعمل ايه؟
......
!"سرحت كمان وتخيلت لو الثلاموس" هنج

!وبدأ ياخد المنبه البصري-صوت شديد مثلا-وينقله لمركز الابصار فأغمض عيني

!او منبه الالم ينقله لمركز الجوع فاروح اكل
.........
ساعتها حسيت ان في نعم خفيه كتييييييييييييييييييييييييييييييييييييير احنا مش حاسين بيها

ولا عمرنا حمدنا ربنا عليها

"وافتكرت الايه"وان تعدوا نعمة الله لا تحصوها

...........تعالوا نقول :يارب لك الحمد على نعمة الثلاموس

يوم مضى!

يوم مضى كانت لنا أحلام..

نغنيها بكل صباح

نناديها بكل مساء

نغذيها...

بامال ودعوات

نرددها بجوف الليل....

يوم مضى ...

ناديناها..

فلم تأت

بكيناها..

فلم يجدي

كرهنا الحب والامل..

وعشنا في ظلام اليأس

والكربات.........

وعاثت بنا الايام

والاوهام

والحزن...

وعاندنا ضياء الفجر

فما عادت لنا أيام..

ولا صارت لنا أحلام..

وبين الحزن والظلمات..

وبين الهم والكربات..

تذكرنا..

بصيص النور

ينادينا..

تذكرنا دعاء الليل

والصلوات..

تذكرنا جمال الليل

والرحمات..

فغادرنا قطار الحزن...

وودعنا ظلام العمر...

وأحيينا موات الليل بالصلوات...

أنا مختلف

من فضلك

اقرا العنوان مره أخرى

فأنا مختلفه فقط وليس أي شيء أخر

وانت مختلف

من حقك أن تذاكر نائما أو واقفا أو مشعلق من البلكونه

ومن حقك ان تلبس ما أردت دون ان تخدش أحدا سواءا أعجب فريساتشي أم لم يعجبه

ومن حقك أن تحدد ما تسمع دون أن يفرض عليك

ومن حقك -لو كنت مقبلا على الزواج-

أن تقرر ...........................كام أوضه وكام طقم كاسات وكام فوطه

ومن حق حضرتك انك ترد على الموبايل وقت ما تحب

ومن حقك يكون ليك وقت تمارس فيه هوايتك دون ان يعتبره الاخرون دلع وان يحاولوا ان يشغلوا لك هذا الوقت

بطريقتهم

ومن حقك ان تهتم بما تريد

وان تحدد اولوياتك انت وحدك

وان تذهب حيث تريد

وان عارضك أحد فمن حقك ان تعذره لانه من عصر لم يذق الحريه ولم يبحث عنها

أو اسخط عليه

كل هذا طالما انك لا تنتهك القواعد والقوانين-الموضوعه لخدمتك-

أنا اسفه

كلمات أعتذاري اسطرها

لكل عزيز طل على مدونتي المتواضعه

ليرى الجديد فلم يجد

............................

وها أنا أعود من جديد

أحتاج دعائكم

وأشتاق إلى حواركم

...........................

اللي اختشوا ماتوا

للي ما يعرفش المثل ده طلع في ايه؟؟؟

المثل ده طلع في حادثه رواها لي خالي

وهي ان مره زمان ايام ما كانت الحمامات البخاريه والمغربيه منتشره

مره في حمام من دول_حقيقة لا أعلم هل كان رجالي ام حريمي_ الحمام ولع

فالناس طلعت تجري واللي اتكسفوا ماتوا في الحريق

بس

لهنا تخلص الحدوته

ويبدا المقال اللي ترددت كثييييييييييرا قبل ان اكتبه

وصراحة ما دفعني لكتابته الان بوست للاستاذ مجدي مش عارفه اسمه ايه

ولكن ملاحظتي لهذه الظاهره

!! بدا مع ستايل جديد من الملابس الرجاليه..........................

ثم شابهه ستايل ابشع من الملا بس النسائيه

وبعدين احتدت المنافسه

ومازال العرض مستمر

ناهيك عن فاترينات الملابس وبوسترات الافلام والالبومات رجالا ونساء

ومش عارفه في ايه بعد كده؟؟؟؟؟؟؟

انا كفتاه يقززني اباحيه الشباب والبنات

ولكن في نفس الوقت انظر اليهم بعين الشفقه لا الازدراء

لانه لو الواحد من دول لو في حاجه في دماغه

ماكانش بقى بالمنظر ده!!!

اعد مستني ايه الموضه السنه دي؟؟؟

قالو اقلع يقلع قالو البس يلبس

والله يا جماعه الظاهره دي مرعبه جدا

انا بقالي بس 6 سنين في مصر

كل سنه في تدهور في الحياء عن السنه اللي قبلها

كل موسم يحمل الابشع

انا مش باكتب التدوينه دي اعرض الظاهره

لانها معروضه لوحدها

انا منتظره منكم الحلول الفرديه والجماعيه

ها؟؟؟؟

رحلة الزهرات

إمبارح رحت الازهر بارك

مع زهراتي الحلويين

كانت رحله في منتهى الروعة

استمتعت انا بيها شخصيا

واستمتعت كمان بصحبة جيل رائع

احيا الامل في قلبي

ووراني مستقبل جمييييييييييل انتظره بفارغ الصبر

..........................

سأنقل لكم بعض من الاحداث والمواقف واللقطات عشان تعيشوا معايا

................

بدأت اليوم بالاستيقاظ 8

لم اكن حضرت اي شيء من السندوتشات او العصائر لاتناوله خلال الرحله لاني كنت عائده للمنزل الساعه 12 مساءا من رحلة في اليوم السابق

وكنت انا واختي المشرفتين على الرحلة

فقولتلها نستفرد بالعيال ونقولهم التذكره ...جنيه وساندوتشين

وهناك..امام البحيرة اقترحت على بناتي ان احنا ناكل مع بعض كل واحدة تأكل اخواتها في الله

بينما كانت اختي تنظر الي بخباثه معتقده اني اطبق مخططي الصهيوني

......................

اخذنا جوله في الحديقة

وكان البنات الطعمين ما بيسبوش اي منحدر غير وياخدوه شقلبه

ولا اي مكان فيه ميه غير ويقضوها تنطيط

وفي احد المرات

سقطت احداهن في المياه

كنت على الجانب التاني

وهممت ان اقفز خلفها

ولكن انتشلتها احداهن بسرعه

والاخرى نزلت على ركبتيها لتحضر لها الشنطه

احساس عالي بالترابط

والاخوه

...........

طلعنا تبه الازهر

اعلى مكان بالحديقه

ولااخفي عليكم حقيقة ان معظمهم صعدوه تسلقا

استمتعنا كثيرا بمشاهدة القاهره ورؤية ماذنها

وسماع اذان الظهر وهو يدوي في القاهره

....................

كان معنا في نفس المكان بعض الشباب

لاحظت على الفتيات محاوله جاده للحفاظ على هدوئهن الغير معتاد

وكذلك تجنب الاحتكاك بهم

مما اثلج صدري

...................

نزلنا من التبه واتجهنا ناحية الشلالات

وهناك اتى احد الموظفين ليخبرني بان المكان ممنوع

لانهم عيال وهيلعبو في الميه

طبعا لم يرحم من تعليقات لاذعه تعبرعن غضبهم

اظرفهم تعليق احداهن

قال يعني ما بتحطش رجليك وتبلبط اخر النهار

....................

صلينا الظهر على احد المسطحات الخضراء

ثم اتجهنا لملاعب الاطفال

هناك...

استمتعنا جدا باللعب

واتت الينا احد الموظفات بتقييم عن الحديقه

فلاقيت حس عالي يالامنيات

يا ابله نكتب التليفون؟؟؟؟

.............

نزلنا باتجاه السور الايوبي

وهناك استعدنا قصة صلاح الدين

وكيف انه قائد صنع التاريخ

وتمنينت معهم ان يكونوا قاده ويتركون اثارا خالده كصلاح الدين

وتذكرنا الام فلسطين

..............

وعدنا للبحيره

منشدين

ياأقصانا الحبيب

ابشر بالخلاص

راجع صلاح الدين

من ابناء حماس

.............

وكمان غنوا

شاطر شاطر شاطر وهوديك القناطر

............

جرينا ولعبنا

......

اتغدينا عند البحيره

وصلينا العصر

ورشوني بالميه من النوافير

..........

وفي طريق العوده

انشدنا

وقلنا الاذكار

وقيمنا الرحله

وودعنا بعضينا بحب

هل صرنا كغثاءالسيل؟؟؟

حاجات كتيره اوي خلتني اكتب

واعرض لظاهره مؤلمه

حاسه بيها بقالي فتره

وترددت كتييييييييييير قبل ما اكتب عنها

لعدة اسباب

لكن على اي حال

هاكتب واقول

.....................

لا ننكر ان الصحوه الاسلاميه في ازدياد

قنوات فضائيه

ومواقع

دعاه كتييييييييييييييير

شرائط

كتب

افراح اسلاميه

وحاجات كتييييييره اوي

وناس كتييييييير

ملتزمين

وبنات محجبات واسدالات و.....و....... و

ولكن اعذروني

رغم كل هذا!!!!

اين التغيير؟

اين النهضه الحقيقيه؟

كام الف بلوه في مجتمعنا مش عارفين نعمل فيها حاجه

..................................................

في عهد الصحابه دولة الاسلام قامت باقل من الف

دلوقتي احنا معشر الملتزمين كام الف

والمحصله ضعيفه

الصحوه كتييييييره لكن ضعييفه

وانا ما باتكلمش عن الصحوه في الهند علشان نستبعد انفسنا

انا بتكلم عن واقعنا

عن الاف بيرجوا المسجد من البكاء في رمضان

ويملوا الشارع في اي جنازه

وشكلهم يفرح اوي

شباب وشابات

بس بعد كده

بيعملوا ايه؟؟

في فجوه رهيبه بين ما نقول ومانفعل

بين ما نعلم وما نفعل

بين ما نريد ان نكون وبين ما نحن عليه

انا بس مش عايزه الصوره تبقى سوده اوي

لاني ضد التشاؤم والاكتئاب

لكن برضه مش عايزين ندحك على نفسنا

ياترى فين المشكله؟؟؟؟؟؟

وايه الحل؟؟؟

ولا مافيش مشكله اصلا؟؟؟؟؟

ارجوا ان يكون الحل بعيدا عن التبريرات والتنظير

مش عارفه!!!!!!!!!

مش عارفه اكتب عن ايه؟

واحشتني مدونتي وطرقعة كيبوردي

واحشني التدوين

وعندي تخمة افكار واحداث اود تدوينها

مش عارفه ابدا منين؟؟؟؟؟؟؟؟؟

اكتب عن الجامعه اللي ودعتها بدون دموع؟

ولا عن كتب كتابي اللي قرب وتقاليد جابتلي المراره واحداث ممتعه ومسؤليه واسره جديده وحاجات كتيييير طعمها جميل؟
ولا اكتب عن تدوينات الاستاذ مجدي الشيقه جدا على مدونته يلا مش مهم وفضيلة النقد الذاتي والنصح لجماعتنا؟

ولا اكتب عن الحب؟
ايوه الحب والابتذال اللي حصل في معناه في مجتمعنا وفي اعلامنا

ولا اكتب عن مشاعر اب بنته الكبيره هيكتب كتابها

ولا اكمل سلسلة ماذا بعد الاسف؟

ولا اكتب عن اشخاص علموني كتيييييير؟

ولا اكتب عن مرحله انتهت من حياتي رائعه؟

وتحمل احداث وسلبيات وايجابيات ودروس تعلمتها
.......................
ولا اكتب عن الاخوه في نظر الاخوات؟

ولا أكتب عن أيام لا تنسى؟

ولااكتب عن حماتي وحمايا الحلوين؟

أنا أسف

كلمه غابت عن كثيرا منا واستبدلناها ب مش قصدي .....حصل خير.....مش واخد بالي

الظروف...هي دي الدنيا

نكثر من عتاب الاخرين

نسأل كثير عن حقوقنا

نتالم ممن أذانا

ممن غاب ولم يسال

..........................

هذا حال كثير منا

.............

أو على الاقل حال كثير ممن قابلتهم هذه الايام

....................

الدكتور متعنت وبابا وماما مطنشني...........جوزي همه الشغل وبس

الجيران حاطين الزباله عالسلم.........صحابي ما بيسالوش عني

الاخوات ما بيشغلونيش.....العيال مغلبني اوي

عيلتي مش مهتمه بيا

و..................الكثير من الشكاوي والتململ وال...........

هذه ظاهره يطلق عليها علماء النفس بالعزو الخارجي

أن الفرد يرى ان كل مشاكله سببها البيئه والظروف والاخرين والنصيب والاي حاجه هو غير قادر على التحكم فيها

.................................................

تعالو نبدأسلم النجاح بأن نشغل أنفسنا بما نحن قادرون على التحكم فيه

تعالوا نحول حياتنا لخلية عمل وحيويه بدل من حالة الركود والكسل و"الانتخه"والتبرير ورمي العواقب والنتائج السلبيه على الاخرين

.....................

تعالوا نعتذر لانفسنا لاننا قصرنا في المذاكره بدل من صب الغضب على الدكتور المتعنت

تعالوا نقولها بدون تردد أنا اسف يا ابي انا اسف يا امي لان حواري معاك هو طلب بدون عطاء

اعتذري لزوجك لانك تتذكرين مشاكل حياتك عند رؤيته وكذلك مصاريف الشهر

جيرانك قد تكون السلبيه هي عامل مشجع لزيادة الزباله في المستقبل

أعتذري لصحابك لان اخوتك مش سليمه وما قبلتهمش زي ما هم وما احسنتش الظن بيهم

أعتذري لربنا لانك ظننتي ان دعوته ملك لافراد ولم تسعي لها بذاتيه

أعتذري لعيلتك لان ما فيش عندك التماس اعذار

.......................................

أكيد في حاجات خارجه عن ارادتنا وعملنا جزء من وسعنا لتغييرها

لكن اللي أكيد أكثر منه ان لو شغلنا نفسنا بوا جبتنا كويس هناخد حقوقنا

ولو عملنا اللي علينا لازم هناخد اللي لينا

ولو اتعلمنا نقول اسفين أكيد هنرتاح

..................................

ملحوظه: أنا اسفه يا خطيبي العزيز لان حيائي يمنعني ان اسطر في مدونتي كلمات في حقك

عذرا لن أتعلم الدرس

يوما ما وانا في المدرسه أراد أحد المدرسين الفاشلين بجداره أن أكون له خير أذن

رفضت بأدب ورحت أبحث عن مدرس خصوصي

جن جنون مدرسي الفاشل فتعمد أيذائي مرسلا بذلك رسالة خفيه لكل زملائي الذين ءامنوا بفشله فبداوا مثلي بالبحث عن مدرس خصوصي

أوذيت فعلا..لكنني كنت مؤمن بفشله الذريع وبحقى

لذلك رغم تكرار الجنون

فانا في كل لحظه تلتقي فيها عيني بعيناه

يقرا في عيني اصرار

وتصرخ كلماتي قائله

عذرا ...منك لن أتعلم الدرس

عزيزي القارئ:اعمل حاستك السادسه للربط بين البوست والصوره