الأحد، 11 مايو، 2008

بسبوسة


المواضيع الكتيرة دي اللي كلها فيهااكل مالهاش علاقه باني خلاص شهرين واتجوز , ولا ان كل اللي حواليا بيحاولو يدوني عصارة خبرتهم, ولااني مهتمه بالاكل
دي افكار وهميه في دماغكم وده سوء ظن
المهم
احكيلكم حكاية البسبوسه
البسبوسه دي حاجه محترمه جدا
كان سفيان الثوري -أحد التابعين-لما يكون عايز يصلي قيام يجيب البسبوسه قدامه ويمني نفسه بأكلها عشان هو كان بيحبها جدا وبعدين يقول لنفسه لو قمت الليل ممكن تاكلها
وطبعا كان بيقوم الليل
................
الشيخ صفوت حجازي لو تعرفوه هو كمان بيحب البسبوسه وقال كده في ندوه كان عملها عن الحب في الاسلام في ساقية عبد المنعم الصاوي
.....................
بقولكم الكلام ده لي
عشان حاجتين
اول حاجه ده دليل على ان العظماء بيحبوا البسبوسة ولاحرج ابدا مني أقولكم اني بحب البسبوسه
الحاجه التانيه
احمد (جوزي) جابلي في عيد ميلادي طبق بسبوسه من لابوار
كان ساعتها عايز يجيب تورته بما انه عيد ميلاد لكن لما افتكر حبي للبسبوسه غير رايه وجبهالي
ساعتها اتعلمت درس جامد اوي وهو
ان احنا كتيير بنقدم للناس اللي احنا عايزينه وبنحبه مش اللي هم عايزينه
وبكده بنكون زي اللي بيحب المربه فبيحطها في السناره عشان السمك يطلع
اوقات مثلا الراجل بيكلم مراته بايجاز شديد رغم انها ممكن تكون بتحب التفاصيل كاغلب النساء والعكس هي تمسك ودنه من ساعة ما يرجع رغم انه عايز الايجاز كاغلب الرجال
كمان اوقات بيكون حد مش متدين خالص وهمه ينجح وبس واحنا عايزينه يصلي مثلا او تلبس الحجاب فنعد نقوله حرام عليك ما تصليش هتدخل النار وهو مش ده اللي شغله
لكن مثلا لو قولناله صلي عشان اما تكون في مشكلة تدعي ربنا فيحلهالك او عشان ربنا يوفقك
اونقولها البسي الحجاب عشان تحافظي على نفسك والشباب يحترموكي وماشابه
اوقات تانيه بنكون احنا مهتمين بالسياسه وغيرنا مهتم بحاجات تانيه زي فرص الشغل زي انه يحقق ذاته زي انها عايزه تجوز او حتى تجيب فلوس عشان تكمل تعليمها
اروح اقولها اعملي بطاقة انتخابيه
لو انت مكانها هتبصلي ازاي؟
يبقى عشان نعرف نتعامل مع الناس كويس لازم نحط نفسنا مكانهم نحس بيهم تكون احتياجات الاخر واهدافه من اكبر اهتماماتنا والا نسيبه فحاله ومنشغلوش باهدافنا احنا او باللي احنا بنحبه

هناك 20 تعليقًا:

غير معرف يقول...

أنا فرحانه علشان الدكتور صفوت حجازى بيحبها بس المشكله أنى أصلا مبحبهاش أوى يعنى لدرجه أن أنا أكتب عنها..... وحسااااكى مكبرة الموضوع بس عموما عسوووووووووله ....

أحمد السباعـي يقول...

موضوع في الجون

بجد بيلمس جانب كبييير اوي في دعوتنا لو اهتمينا بيه

وبيفرق معانا جدا لو استشعرناه في كل عمل

وخير دليل على كده النجاح الكبير لحملة يلا نحب بجد في الجامعة وتفاعل الطلاب معنا

نور الهدي يقول...

انا اول مرة ادخل علي مدونتك الجميلة بس ان شاء الله هدخل كتير ....
انا كمان بحب البسبوسة جدا جدا.......
وبجد انا حسة ان مهم جدا اننا ندي الناس اللي هما عايزينه
فمثلا اول السنادي في استقبال اولي كانواعايزينا ننزل نكلم البنات عن الاسرة ونشاطها وكيفية الاشتراك ..بس احنا كنا شايفين اننا ننزل نكلمهم عن المواد والدكاترة والمدرجات وبعدها الناس سالتنا احنا مين

bent elbana يقول...

بعيدااا عن اني مبحبش البسبوسه

غير لما اكون متدايئة بأكلها

بس اما انتي بتعمليها بحبها اوي

حلوووو اوي البوست بس مش عارفه

حكاية اني احط نفسي مكان الناس

دي مش عارفه انا بعملها ولا لأ

انتي ادرااااه

أبو حبيبة يقول...

السلام عليكم
خاطرتكم متميزة .. ونصيحة من أخ متزوج .. حاولي تكلي دلوقتي البسوسة، لأن بكره مش حيكون في عيش مش بسبوسه ..

بارك الله لكم في أسرتكم ..

يسعدني زيارتكم لمدونتي
http://abohabeba.blogspot.com/

من القلب يقول...

مهم جدا لما تحب تهادى حد شوف اللى يحبه وهيبسطه مش اللى انت تحبه ...

وتغيير الادوار...خاصة وانا بتكلم مع اللى قدامى .....محتاج لمرونه جوزة الهند



واخيرا انا وابنى وزوجى من عشاق البسبوسه

أخت مسلمة يقول...

أنا كمان بحب البسبوسة

حقيقي كتير بننسي وبنهادي حد بشئ احنا بنحبه من غير ناخد بالنا هو بيحب ايه

فكرة البوست رائعة
وكمان المدونة جميلة جدا
دي أول زيارة
أكيد مش الاخيرة ان شاء الله
وربنا يوفقك و يتمم زواجك بخير

أُكتب بالرصاص يقول...

أنا كمان بأحب البسبوسة


ولا أنسى ابارك لك على الزواج

وقبل الزواج الراجل بيجيب لزوجته ما تحبه وليس ما يحبه

وبعد الزواج مابيجبيش حاجة لمدة سنتين علشان بيسدد في نفقات الزواج
وبعد السنتين بينسى هي كانت بتحب إيه أصلا وبيجيب حاجة واحدة

بامبرز للعيل ، او لبن مجفف ،

وبالتوفيق للبسبوسة
:)

غير معرف يقول...

الصراحة ده أول مرة ازور مدونتكم الكريمة و بحق أري انها مدونة دسمة يعني اسمها مكسرات و أول ما شفت شفت البسبوسة و تلها جوز الهند و بعدها مكسرات الصراحة انا خفت اكمل لحسن الاقي التدوينة اللي بعدها باسم بوزو و كاراتيه او الزبيب و عين الجمل بس بجد بجد مدونة متميزة في كل شئ من الاراء و المسميات و الاكلات بارك الله لك و فيك و في زوجك .
للعلم انا بحب الفزدق و الهريسة فلو تكتبي عنهم حاجة يبقي شئ جميل جدا.
غير معروف بالمرة

أختكم فى الله يقول...

جميلة مدونتك كلها والمقالة دى كمان جميلة اوى


بارك الله فيكى وجزاكى كل خير


ياريتك تشرفينى فى مدونتى وتشاركى معانا فى حملتنا

يسرا يقول...

مع أني لا أفضل البسبوسة
عندنا في اسكندرية اسمه (هريسة) على فكرة

لكن على كل حال تدوينتك مميزة تلمس جانبا مهما كثيرا ما نغفل عنه

وبارك الله لكما وبارك عليكما وجمع بينكما في خير

Noor_eldeen35 يقول...

مدونة شهية جدا :)
جزاكم الله خيرا فتحتي نفسي..

دمتم بخير

ايمان @@ بنت الحرية يقول...

السلام عليكم ورحمه الله وبركاته

هذه حملتك أتينا بها إليك
إلى متى الصمت

إلى متى نترك أمورنا يحمل همها غيرنا
فنحن لها إن شاء الله

مهما قالوا ومهما زيفوا الحقائق فتلك عقولنا باقية

ادعوكم للتفاعل مع الحملة بالتوقيع وبتحمل مسؤليتكم كاملة في إنجاحها فهي حملتنا جميعا

أنشروا لوجو الحملة ورابط المدونة والجروب لديكم

حثوا كل من تعرفوا على المشاركة والتفاعل

هدفنا ان نصل مليون فرد وسوف نصل أن شاء الله

بيك وبينا وكل امتنا هنعلنها ونقول

أنا بحب الإخوان

http://iloveikhwan1928.blogspot.com/

أرسلوا تلك الرسالة لكل من لديكم

dodda يقول...

جميل جدا ومن اول مرور على مدونتك
اقول انك بسبوسه بعين جمل
وده احاى نوع بسبوسه من وجهة نظرى الا انه نادر نلاقيه عند اى حلوانى وانا بعملها فى البيت وبتطلع حلوه جدا

ريم الرياشي يقول...

موضوع جميل تسلم ايديكي

بس ايه حكايتك مع الحلويات

Noor_eldeen35 يقول...

هنا..
http://shakhabit2.blogspot.com/2008/10/blog-post.html

انا مش معاهم يقول...

الف مبروك

من القلب يقول...

فين مكسراتك يا مكسرات
وحشتينا ياريت ما يكونش الجواز اخدك مننا

bent elbana يقول...
أزال المؤلف هذا التعليق.
ريم الرياشي يقول...
أزال المؤلف هذا التعليق.