الخميس، 25 مارس 2010

سيرين ...نورت الدنيا


بعد رحلة طويييلة وشاقة من الحمل والولادة
وصلت حبيبتي
وغيرت كل حياتي
نورتها وونستني
واسعدتني وشغلتني
ومن كل حاجه خدتني
وكمان قلبت ليلي نهار ونهاري ليل
وغيرت ثوابت حياتي
وغيرت عاداتي
وخدت قلبي
بحبها جدا وبحب ضحكها وصريخها
وريحتها وهدومها وبتوحشني
وبقينا صحاب بس من طرف واحد
يعني انا بس اللي بحكي وبسال
بس راضية
ومع سيرين فقدت قدرتي على التركيز
وتضائلت ساعات نومي
واصبحت حياتي روتين متكرر
وحددت اولوياتي جدا
وبقى مزاجي مرتبط بيها
أضحك لو دحكت وازعل لو زعلت
وخايفة عليها من أي حاجه
وبحلم بيها وهي بتمشي
وهي في المدرسة
وهي من الاوائل
بحلم بحفلة لبسها للحجاب
وحفظها اول جزء
بحلم وهي بتساعدني فتوجيه اخواتها
وهي بتعمل اول كيكة
وهي بتمسك قلم الكحل لاول مره
وهي بتحدد تخصصها
وهي بتفتتح مشروعها
وهي عروسة
هكون حمى صعبة
يااااااااااه لو زعل بنتي
مش مهم فلوسه بس يكون راجل
بحلم بيها وهي ام
هتخليني جده وتكبرني
بس سنة الحياه
نفسي أحسن تربيتها
نفسي ما ادايقهاش عمري
نفسي تكون شخصية جميلة
نفسي يكون حظها من الحياة وافر
نفسي فكل الخير ليها
نفسي تكبر ونخرج سوى
واخد رأيها
ونكون صحاب
وتاخدني فحضنها
ونفسي انااااااااااااااام

هناك 5 تعليقات:

وضّاح يقول...

الله أكبر, ماشاء الله :)

بورك لك في الموهوب وشكرت الواهب وبلغ أشده ورزقت بره.. :)

جميلة ماشاء الله :)

واسمها جميل :)

كان في واحد عزمني على عقيقتها لكن كعادته "خلي" بي, وبآخرين, يدعى عمر, حضرتك تعرفيييه ؟

زمرده يقول...

ماشاء الله الف مبروك يا حبيبتي

وطبعا انا عارفه من زماااان

ربنا يحفظها يارب و تكون باره بيكي

وبوالدها ويباركلكوا فيها وتنشأ يا رب

في طاعه الله وطاعتكوا

ويارب كمان تعرفي تنام

بس هانت ان شاء الله

ســـارة يقول...

ربنا يبارك لك فيها يارب ويجعلها من الصالحات

المتبهـدلـون فـي الأرض يقول...

السلام عليكم
ماشاء الله لاقوة إلا بالله
بورك لك الموهوب وشكرت الواهب ورزقت بره وبلغ أشده
يبدو أنه تبرير مناسب لطول غياب
بارك لكم بها .. وحقق أحلامكم فيها

أُكتب بالرصاص يقول...

تبارك الله

بورك لك في الموهوب وشكرت الواهب وبلغت اشدها ورزقت برها

سيرين....!

ماشاء الله ..اسم جميل.. احسنت الاختيار

بس سمعته فين فين فين ...!؟
حاسس اني سمعته قبل كدا


اه

أبنتي أسمها سيرين
:)