الأحد، ٢٧ أبريل ٢٠٠٨

جوزة الهند


أحيانا بنلاقي حاجات حوالينا تعلمنا معاني نسينها
زي كده ما بنقول : صبور زي الجمل ..
أو مرن زي المايه..
او وضيع ومتكبر زي الدخان..
كمان من هنا ورايح هنقول ده .....و...........و........ زي جوزة الهند

تعالو اقولكم اشمعنى جوزة الهند؟
اولا:جوزة الهند اسمها جوزة الهند
رغم انها راحت مصر والسودان وسوريا واستراليا ولفت العالم لكن ما زالت هي جوزة الهند
ورغم انه لما واحد يجي ينفي عن نفسه صفة العبط يقول هو انت فاكرني جاي من الهند
وكمان لما يكونوا عايزين يقولوا على واحد عبيط يقولو ده جاي من الهند على فيل
كل ده ماخلاش جوزة الهند تغير اسمها او تنكر اصلها هي ما زالت جوزة الهند

ثانيا:احنا بناكل رز اللبن بجوزة الهند والبسبوسة بتتعمل بجوزة الهند ولو تورتة شيكولاته بنزوقها بجوزة الهند وكمان لو مهلبية جزر بنحط عليها جوزة الهند
ولو جربت تاكل شيكولاته باونتي او جيرسي هتلاقيا محشية جوزة الهند ولو جربت تجيب رافيللو هتلاقيا كرات جوزة الهند
يعني مرونه لا نظير لها
مستعده تدخل الفرن او تتحط في الشيكولاته او تكون حاجه هامشيه يعني زواق على الوش
مكان ماتحطها تلاقيها
تجيب في حتت كتيير
مش عايشه في دور المهم
عندها مرونه رهيبه

ثالثا:رغم انها لفت كل مكان ودخلت اكلات كتيييره اوي لكن لونها لسه ابيض
ماعكرهاش سواد الشيكولاته ولا برتقنة الجزر ولا صفار البسبوسه
يعني بتروح كل حته منفتحة على مجتمعات كتيير وبتدخل مع نكهات كتيير وتكون في اوضاع مختلفه لكن زي ماهي ماغيرتش توبها وقالت عشان ماكونش غريبة وهو ده اللي اداها تميزه في اي مكان تروحه
.........................
بصراحه اتمنيت لو كانت جوزة الهند واحده عشان اصاحبها واتعلم منها
.....
لو حد في يوم من الايام عايزيجيبلي حاجه حلوه يجيبهالي بجوزة الهند


هناك ١٢ تعليقًا:

Bent Elqran يقول...

بوست تحفه يا مكسرات

فعلا لازم الواحد يفضل أصيل فى أى مكان كان فيه

إنتى عارفه بعد ما قرأت البوست

عايزه أكل باونتى

يلا هاتي لى واحده :D

khobayb يقول...

بصراحة ..

ملاحظة رائعة

وتحليل جميل

---

الدعوة دي فعلا محتاجة جوز هند !

:)

آيــة يقول...

انتي فظيييييييييعة يا بنت ..
ايه ده ..
و كمان سراقة :)))))
ازاي بتعرفي تاخدي الأفكار و بالبراعة دي تعيدي صياغتها و بلورتها و طرحها ببساطة و بنفس درجة العمق ..
المشكلة زي ما انتي راسية على الدور طبعا ..
مش انك تكوني بمرونة جوز الهند .. المشكلة فعلا انك تحافظي على بياضك زيها و تفضلي كمان بنفس قوة التأثير و التركيز مهما كان هناك مذاق آخر قوي .. تبقي الأقوى و صاحبة التأثير المميز ..
على فكرة انا كمان نفسي اصاحب جوزة هند .. يا غلسة :))
دمتي رائعة و مبدعة و شفافة :)))

الباحث عن الحقيقة يقول...

والله جميل تأملك ده في جوزة الهند
سبحان الله
كل حاجه حوالينا فعلا بتذكر ربنا
بتذكر بتفردها وتميزها وما تحمله من نفع ودروس وعبر ايضا
سبحان الله
ان شاء الله ان قابلتك اجيبلك وايف هند ..جوزة هند ..بس انا كنت فاكر اسمها هاسبند هند
انتي جبت التاء المربوطه منين

Fahd يقول...

احنا بناكل رز اللبن بجوزة الهند والبسبوسة بتتعمل بجوزة الهند ولو تورتة شيكولاته بنزوقها بجوزة الهند وكمان لو مهلبية جزر بنحط عليها جوزة الهند
ولو جربت تاكل شيكولاته باونتي او جيرسي هتلاقيا محشية جوزة الهند ولو جربت تجيب رافيللو هتلاقيا كرات جوزة الهند



انا جعت

_**( قلب الأسد )**_ يقول...

بصراحة تشبيه رائع فليتجميع السائرين فى طريق الدعوة فى ثبات جوزة الهند
مشكورة اختى على البوست الرائع
تقبلى مرورى

أحمد السباعـي يقول...

ماشاء الله

انا مش بحب جوز الهند بس أكيد بعد
البوست ده
هحاول أكون زيه في حياتي


وجزاك الله خيرا على استخلاص هذا المعنى الجميل من أشياء حولنا نراها كل يوم

بنت من الاخوان يقول...

بنت القرءان
انت اللي تحفة
وليك علي باونتي
بس غالبا هجيبهالك واكلها في الطريق
.........
خبيب
شاكره مرورك
وبصراحة انت لخصت هدفي من البوست
..............
أيه
بجد فخورة بكلامك ورأيك في البوست
بس مش عارفة ليه حاسه ان لسانك طول
.........

بنت من الاخوان يقول...

الباحث عن الحقيقة
أولا مدونتك تحفة
ثانيا
أنا خليتها جوزة الهند مش جوز الهند لسبيين أن أناط ول عمري بنطقها كدة ثانيا أنا بنت فكان لازم حد بالجمال ده اخليه بنت زيي
.............
فهد
أنا شاكرة مرورك
والمرة الجايه هاعمل عينات للمدونين
...........
قلب الاسد
شرفني مرورك
وفعلا زي ما قولت لخبيب
انت لخصت هدفي من التوينة دي
أشكرك
..........
أحمد السباعي
نورتني
وجميل اوي منك أنك رغم انك مش بتحبها لكن هتتعلم منها
نصيحة : حاول تحبها عشان هتلاقينا مدخلهالك في نص الاكل

bent elbana يقول...

حلو اوي البوست زي الكاتباه

اظن انك بتنزلي البوستات في وقتها

اي نعم انا مشوفتوش غير لما نزلتي

البعدهبس برده جه في وقته وليكي

عندي انتي وبنت القرآن باونتي

jejemam55@gmail.co يقول...

جميل اوعى البوست
وجميل اوى المعنى
ورغم انى مش بفضل جوزة الهند كتير
الا انى هتعلم منها حاجات كتير

جزاكى الله خيرا

Unknown يقول...

شركة مكافحة حشرات بالدمام
شركة تسليك مجاري بالدمام
شركة المثالية للتنظيف
شركة المثالية لتنظيف المنازل